Katungod sang isa ka seafarer ang mag-refuse to sail ukon magdumili sa pagbyahe sa kadagatan kag dapat ini irespeto sang kapitan sang barko kag manning agency.
Ini ang nangin pahayag ni Capt. Vianne De Vicente, Bombo International News Correspondent to Strait of Hormuz, sa interview sang Bombo Radyo Koronadal.
Ginpabutyag man niya ang importansya sang tingog sang Master ukon Chief Engineer sang barko sa pagsumiter sang refusal to sail sa ship owner kag manning agency.
Apang suno kay De Vicente, bangud yara sa linya ang negosyo kag kwarta, may mga ship owner nga nagahatag sang dako ukon dugang nga compensation sa mga crew agud magpadayon sila sa pagbyahe kag paglabay sa delikado nga ruta.
Madumduman nga duha ka Pilipino nga seafarer ang napatay matapos ma-igo sang tatlo ka wala pa makilala nga projectiles ang Saudi-flagged crude oil tanker Sidr samtang nagapalapit sa Strait of Hormuz sang Agosto 31, suno sa Department of Migrant Workers.
Suno kay Migrant Workers Secretary Hans Leo Cacdac, 16 ka Pilipino nga seafarer ang sakay sang barko sang natabo ang insidente, samtang nagluntad ang sunog apang nakontrol ini sang crew.
Gindala sa Oman ang mga lawas sang duha ka biktima, samtang luwas ang 14 ka iban pa nga seafarer kag ginapreparar na para sa ila repatriation.
