Ginahinyo sang Department of Health (DOH) ang publiko nga magreport sang bisan ano nga anomaliya ukon problema sa mga super health centers sa pungsod nga indi nagagana.
Suno sa DOH, ilunsar sa Lunes, Oktubre 20, ang kampanya nga “Oplan Bantay Super Health Center”, nga magahatag dalan sa mga pumuluyo nga magsumiter sang report, retrato, kag video sang mga inaktibo nga health centers sa ila lugar.
Antes pa man ang opisyal nga paglunsar, nakabaton na kuno ang DOH sang pila ka report sa social media nahanungod sa mga pasilidad nga wala pa matapos ukon wala pa nabuksan, rason nga ginlunsar ang Citizens Participatory Audit suno sa laygay sang Independent Commission for Infrastructure (ICI).
Ginreport man ni Health Secretary Ted Herbosa sang Oktubre 17 sa ICI nga may yara 300 ka super health centers nga gindeklarar nga “incomplete” kag ginapaimbestigahan sa karon.
Base sa pinakaulihi nga datos sang DOH, halin sa 878 ka super health centers nga ginpondohan sa idalom sang Health Facilities Enhancement Program, 196 diri ang operational na, 17 ang bahagya nga operational, 300 ang indi nagagana, kag 365 pa ang ginaobra pa.
