Nagapangasubo sa karon ang mga residente sang Ibajay, Aklan matapos ginpatay paagi sa pagpangluthang si Vice Mayor Julio Estolloso samtang yara sa sulod sang iya opisina sa munisipyo, pasado alas-9:15 sang aga, Biyernes, Agosto 8, 2025.
Suno kay P/Major Rajib Salvino, hepe sang Ibajay Municipal Police Station, yara sa Sangguniang Bayan session hall si Estolloso sang nag-abot ang suspek nga si SB Member Mihrel Senatin.
Gin-usisa sang suspek ang kopya sang tanan nga ordinansa nga napasa halin sang siya ang nag-umpisa magserbisyo bilang konsehal.
Pagkatapos sini, ginkumpronta niya ang biktima kag ginhambalan kun ano kuno ang iya sala, antes sini ginkuha ang iya armas kag ginluthang si Estolloso makapito ka beses.
Nangin resulta sini ang madamo nga pilas sang bala sa lawas ni Estolloso, kadam-an sa wala nga parte sang iya dughan.
Nakarekober ang mga otoridad sang mga empty shells sang Glock 17 9mm revolver sa crime scene.
Tungod sa sunod-sunod nga lupok, nagpanik ang mga empleyado kag mga tawo sa munisipyo kag nagdalagan palagyo. Temporarilyo ginpasirado ang munisipyo kag gin-cordon ang area para sa imbestigasyon.
Nagpalagyo ang suspek pero gilayon nga nadakpan sang mga pulis sa ila puluy-an. Gindala naman sa Ibajay District Hospital ang biktima pero napatay man ini pasado alas-10:23 sang aga.
Nakuha man sang mga otoridad ang armasl nga ginpatihan amo ang gin-gamit sa krimen, kag ipresentar ini bilang ebidensya.
Sa iya mensahe, nagpaabot sang simpatiya kag pakigbuylog sa kasubo si Ibajay Mayor Miguel Miraflores sa pamilya ni Estolloso.
Suno sa alkalde, magapadayon nga buhi ang legasiya ni Estolloso sa iya pagserbisyo sa banwa.
Ang suspek kag ang biktima pareho nga miembro sang lokal nga partido politikal nga Tibyog-Akean.
