Ginpabaskog sang Department of Education (DepEd) ang kampanya batok sa bullying sa mga bulutuan matapos pirmahan ni DepEd Secretary Sonny Angara ang ginbag-o nga Implementing Rules and Regulations (IRR) sang Anti-Bullying Act of 2013.
Suno kay Angara, wala sang lugar ang bullying sa mga bulutuan nga dapat mangin hilway kag luwas nga lugar para sa pagtuon sang kabataan.
Base sa ginbag-o nga IRR, ginamandoan ang tanan nga pampubliko kag pribado nga bulutuan, lakip na ang mga community learning centers kag mga eskwelahan sa guwa sang pungsod nga yara sa idalum sang DepEd, nga ipatuman ang Standard Anti-Bullying Policy.
Kalakip diri ang mga school-wide prevention programs, temprano nga interbensyon, kag klaro nga proseso sa pagdumala sang mga reklamo.
