Ginbuyagyag na sang testigo nga si alyas “Totoy” ang iya matuod-tuod nga pagkatawo sa kaso sang mga nagkaladula nga mga sabungero.
Nagpakilala siya bilang si Julie “Dondon” Patidongan, anay head security sang Manila Arena kag manager sang AA Cobra Farm sa Sta. Cruz, Laguna. Suno sa iya, isa man siya sa malapit nga abyan ni Atong Ang.
Ginpahayag ni Patidongan nga tatlo ka tawo ang ginalantaw nga mastermind sa pagkadula sang mga biktima, kag lakip diri si Atong Ang.
Ginsiling man niya nga bangud sa mga pamahog sa iya kabuhi, nagdesisyon siya nga magbuyagyag sang kamatuoran sa otoridad.
Ang mga sabungero madumduman nga nagkaladula sang Enero 2022 matapos ginkabig nga sakop sang online “game fixing” nga ginahiwat sa Manila Arena.
Padayon ang imbestigasyon sang mga otoridad kag ginapanawagan man nga mapatawag sa Senado si Atong Ang kag iban pa nga ginhingadlan ni Patidongan, agud mapamat-an ang kamatuoran sa likod sang madugay na nga kaso sang mga nagkaladula nga sabungero.
