Ginhingyo ni Senador Loren Legarda nga mangin kasuguan ang iya ginaduso nga pagtalana sang “living wage” sa baylo nga “minimum wage”.
Sa idalum sang Senate Bill 2662 nga ginfile ni Legarda, gintumod sini nga ang living wage amo ang suweldo nga nakabase sa oras kag sahi sang trabaho kag ini ang dapat nga makaigo para mabuhi sang desente kag dignidad ang mga mamumugon.
Ginaduso ni Legarda nga ang living wage ang dapat nga ginahatag nga suweldo sa mga mamumugon agud mahatagan sila sang kahigayunan nga mag-uswag kag mangabuhi nga may mapag-on nga pundasyon.
Gintumod ni Legarda ang report sang IBON Foundation nga tubtub sang Marso 2024, yara sa ₱1,207.00 ang nagakadapat nga daily minimum wage sang mga mamumugon nga makaigo agud makadungan sa mataas nga presyo sang mga balaklon kag serbisyo.
