KORONADAL CITY – Ginbawian sang kabuhi ang isa ka helper samtang pilason naman ang driver sang isa ka mixer truck matapos nga madisgrasya sa bahin sang Purok Garfin, Brgy. Paraiso, Koronadal City pasado alas-9 kanina sang aga kun diin nadulaan sang brake ang mixer truck.
Suno kay PMSgt. Fely Bascon, traffic investigator sang Koronadal City PNP, gikan sa banwa sang Banga South Cotabato ang truck kag padulong sa siyudad sang Koronadal.
Apang pag-abot sa Purok Garfin, Barangay Paraiso nadulaan ini sang kontrol bangud na-loss brake kag bangud madasig ang dalagan sang mixer truck, nag-swerve ini tubtob nga nahulog sa kanal kag nagbaliskad.
Halos nagupi ang unahan nga bahin sang mixer truck kun diin naipit pa ang driver kag helper sini kag nangin mabudlay ang pag-rescue sa ila.
Nadala pa sa hospital ang mga biktima apang ginbawian sang kabuhi ang helper nga ginkilala kay Mike Angelo Imas, 19-anyos nga residente sang Surallah.
Samtang, luwas naman kag padayon nga ginabulong sa South Cotabato Provincial Hospital ang driver nga si Ronnie Almoguera, 40-anyos nga residente sang Little Baguio, Surallah, South Cotabato.
Panawagan naman sang City traffic sa tanan nga mga nagamaneho nga mangin mahalong agud malikawan ang aksidente sa dalanon.
