Gimando sang Commission on Audit (COA) nga isauli ni Vice President Sara Duterte kag duha ka opisyal sang Office of the Vice President (OVP) ang P73.287 milyones nga confidential funds nga gin-gasto sa sulod lamang sang 11 ka adlaw sang Disyembre 2022 bangod sa kakulang sang nagakaigo nga dokumentasyon.
Ginpamatud-an sang COA ang Notice of Disallowance nga una nga ginpagwa sang Agosto 8, 2024, kag ginbalibaran man sini ang motion for reconsideration nga ginpasaka may kaangtanan sa nasambit nga pondo.
Suno sa COA, kinahanglan nga may nagakaigo nga dokumentasyon kag masunod ang mga pagsulundan sa paggamit sang pondo sang gobyerno agud masiguro ang accountability kag transparency sa paggasto sini.
Sa pihak sini, ginpamilit ni VP Sara nga wala sang anomalya ukon sala nga paggamit sang pondo sa iya opisina.
Ang P73.287 milyones kabahin sang P612.5 milyones nga confidential funds nga ginkwestyon sa paggamit kag isa sa mga isyu nga ginlakip sa impeachment complaint batok sa Bise Presidente.
Samtang, ginpahayag ni Atty. Michael Poa, spokesperson sang defense team ni Duterte, nga magapasaka sila sang petition for certiorari sa Korte Suprema agud kuwestyonon ang desisyon sang COA. Suno sa iya, gamiton sang kampo ang tanan nga legal nga remedyo nga yara sa ila agud atubangon ang disallowance order.
