KORONADAL CITY – Nagapadayon sa subong ang imbestigasyon sang mga otoridad na nagluntad nga pagpanghaboy sang illegal nga droga pasulod sa South Cotabato Rehabilitation and Detention Center (SCRDC) sa diin ginhana ini nga ipusulod paagi sa pagpalapaw sang mga kontrabando sa mataas nga kudal sang nasambit nga pasilidad.
Ini ang ginkumpermar ni South Cotabato Rehabilitation and Detention Center (SCRDC) Warden Juan Lanzaderas sa interview sang Bombo radyo Koronadal.
Suno sa opisyal, ginhaboy ini sang wala pa mahibaluan nga mga indibidwal alas- 11 sang gab-i adlaw sang Martes, Agosto 13 2024.
Madasig naman nga namutikan ini sang mga jail guard sang pasilidad kabangdanan nga madinalag-on ini nga na intercept sang mga otoridad.
Nag-abot naman sa 5 ka gramo ang kabug-aton sang isa ka sachet nga may unod sang ginapatihan nga shabu nga naga ginabulubanta nga may balor nga P7,000- P8,000 lakip na ang 5 ka mga foil.
Suno sa imbestigasyon sang mga otoridad posible nga ginbutangan ini sang pampabug-at sang mga suspek kabangdanan nga nakasulod ini sa pasilidad apang nabulilyaso bangud sa naglagapok ini sa atop.
Dako naman ang pagpati ni Warden Lanzaderas nga mga anay preso ang naghaboy sang mga kontrabando ukon mga paryente sang mga ara sa sulod sang pasilidad.
