Nalabawan na ni US Vice President Kamala Harris si Republican Party nominee Donald Trump sa US presidential race sandig sa pinakabag-o nga survey.
Si Harris subong ang presumptive nominee sang Democratic Party.
Sa Reuters/Ipsos poll, nag-angkon si Harris sang 44 percent nga rating, duha ka puntos nga abanse kay Trump.
Ginpatigayon ang ini nga survey sa sulod sang duha ka adlaw matapos nga gin-anunsyo ni US President Joe Biden nga indi na sia magpadalagan para sa iya ikaduha nga termino bilang presidente kag gin-endorso ang iya Vice President nga si Harris.
Sa survey sang nagligad nga semana, nagpatas sa 44 percent nga rating ang 59 anyos nga si Harris kag ang 78 anyos naman nga si Trump.
Wala pa sang opisyal nga kandidato ang Democratic Party para sa presidential election apang dako ang posibilidad nga si Harris na ang ila mangin pambato kasunod ang endorsement sa iya nanday Biden kag former US Speaker of the House Nancy Pelosi.
