KORONADAL CITY – Padayon nga ginahibalo kun sin-o ang wala kaluoy nga ginikanan nga naghaboy sang isa ka patay nga lapsag nga wala na sang pila ka parte sang lawas sang makit-an sang mga otoridad sa gate sang isa ka panimalay sa bahin sang Blk.3 ,Crossing Diaz,Barangay Zone III ,Koronadal City makaligad nga ginpatihan nga ginbilin ini sang wala pa makilal-an nga mga indibidwal.
Sa interview sang Bombo Radyo Koronadal kay PLt.Col.Hover Antonio, hepe sang Koronadal CPS ginpahayag sini nga ginsulod suno pa ang nasambit nga lapsag sa isa ka ecobag sa diin ginapatihan nga ginbilin lamang sa higad sang dalan kag ginpatihan nga gintaban sang isa ka layaw nga ido.
Dugang pa sang Antonio, naguwa man sang imbestigasyon sang mga otoridad nga nagkulang na ang pila ka parte sang lawas sang lapsag bangud nakaun na ini sang ido nga una nakasapo sa iya.
Bangud sa natabo, wala na mahingagaw pa nga buhi ang nasambit nga lapsag kag tigayon ini nga nautasan sang kabuhi.
Gin turn-over naman sang kapulisan ang makaluluoy nga lapsag sa Department of Social Welfare and Development (DSWD) agud nga hatagan sang disente nga lubong.
Nagapadayon naman ang imbestigasyon sang mga otoridad sa kun sin-o ang mga responsable sa pagbilin sa nasambit nga lapsag.
Sa tion nga makilala ang mga ginikanan nga naghaboy sang lapsag, magapangatubang ang mga ini sang kaso nga kriminal.
