Nagsaka pa sa halos 1000 ang pamilya nga apektado sang baha kag landslide bangud sa padayon nga pagbuhos sang ulan sa probinsiya sang Sultan Kudarat.
Ini ang ginpahayag ni Joy Hallegado, Provincial Disaster Risk Reduction and Management Officer (PDRRMO) sang Sultan Kudarat sa interview sang Bombo Radyo Koronadal.
Suno kay Hallegado, ang mga apektado nga banwa ang ginalakipan sang Bagumbayan, Senator Ninoy Aquino, Esperanza, Lambayong kag Lutayan.
Ang pinakamalala nga apektado amo ang banwa sang Bagumbayan kun diin may mga pamilya pa nga nagapabilin sa evacuation centers bangud sa dalagko nga tension cracks, landsldie kag baha.
Samatang, ang iban nga kabaranggayan nga nangin apektado sang baha ang nakabalik na sa ila tagsa ka panimalay matapos nga magtahaw na ang baha.
Samtang, passable naman ang national highway sa Barangay Chua, Bagumbayan kun diin nagluntad ang malapnagon nga baha nga nagresulta sa pagka-stranded sang ginatos nga mga motorista sang nagligad nga adlaw.
Sa subong, nahatagan na sang foodpacks ang mga apektado nga pamilya.
Samtang, ginalauman naman nga madugangan pa ang numero sang mga apektado sang kalamidad bangud wala pa matapos ang assessment kag validation sang tagsa ka Municiapl Disaster Risk Reduction and Management Councils.
Padayon man ang panawagan ni Hallegado nga mangin mahalong kag vigilante sa tion nga magbuhos ang mabaskog nga ulan.
