KORONADAL CITY – Nagasinggitan sang hustisya sa karon ang pamilya sang lending collector nga gintiro-patay sa exit road Purok San Miguel, Barangay Calean, Tacurong City, pasado alas-4 Martes sang hapon, Hunyo 18,2024.
Ginkilala sang mga otoridad ang napatay nga si Danel Hope Suelo, 28 anyos nga residente sang Purok Bagacay, Barangay Caloocan, Koronadal City.
Sa eksklusibo nga interview sang Bombo Radyo Koronadal kay Manong Danilo Suelo, amay sang biktima, emosyunal sini nga ginsaysay nga ang pakaisa sang bata sini nga kaupod niya man sa trabaho ang nagtawag sa ila agud ipahibalo ang natabo sa biktima.
Antes pa man natabo ang pagpatay sa biktima, ginlaygayan na suno pa ni Manong Danilo ang iya bata nga mag-untat na kag maghalong sa trabaho bangud mainit sa tawo ang kwarta ilabi na nga adlaw-adlaw ini nga nagapangolekta.
Nahibaluan nga magduha ka tuig na ini nga nagatrabaho sa Eleven Twenty-Eight (1128) company nga nakabase diri sa siyudad sang Koronadal
Ikaduha nga bata si Danel Hope ukon “Botchoy” kun diin ulihi siya nga nakapakig-angot sa iya amay sang Domingo nga adlaw pa sa selebrasyon sang Father’s Day.
Una diri, ginkumpirmar ni PLt.Col. Bryan Bernardino, hepe sang Tacurong City PNP nga matapos gintiro ang biktima, gin-agaw ang bag sini nga may unod nga koleksiyon ukon kwarta lakip na ang iya motorsiklo.
Nakuha naman sa crime scene ang 4 ka slug sang wala pa matumod nga armas luthang nga gingamit sang suspek sa pagpatay sa biktima.
Sa karon, nagapadayon pa ang imbestigasyon sang mga otoridad sa natabo kag kun sin-o ang responsable sa pagpatay sa iya.
