Pagaumpisahan na ang pagsiga sang mga dekorasyon kag Christmas tree nga may temang “Enchanted Kingdom” sa Koronadal City sa Disyembre 1, 2026, bilang bahin sang selebrasyon sang PASKORONADAL.
Sa interview sang Bombo Radyo Koronadal, ginpahayag ni Mayor Erlinda Araquil nga isa ini sa mga ginapaabot nga hitabo sa selebrasyon, lakip ang pagpasiga sang Christmas tree sa atubang sang City Hall kag sang mga suga sa nagkalainlain nga bahin sang syudad.
Ginpahayag man sang alkalde ang sabat sa mga nagapamangkot sa paggamit sang kolor purple sa mga dekorasyon, nga ginakabig sang iban nga indi kasami sa naandan nga pula, dalag kag berde.
Suno kay Araquil, una pa lamang nga hitsura ang nakita sang publiko kag indi pa ini ang katapusan nga disenyo. May dugang pa nga mga kolor nga igadugang sa dekorasyon.
Dugang pa niya, importante man nga bukas ang tagsa ka tawo sa pagbaton sang nagkalainlain nga panan-awon agud indi lamang negatibo ang pagtan-aw sa mga ginahimo sang iban.
