Ginpakakas ni Senate Impeachment Trial Presiding Officer Chiz Escudero sa Transcript of Stenographic Notes (TSN) ang paggamit sang pulong nga “absurd” sa paglaragway sa forensic report nga ginpresentar sa impeachment trial batok kay Vice President Sara Duterte.
Nagtuhaw ang kontrobersiya sang ginpamangkot ni Defense Counsel Atty. Justin Nicol Gular ang ila testigo nga si Atty. Suzette Balucanag-Punay nahanungod sa forensic report ni anay House witness Atty. Alexander Cabrera.
Sa iya sabat, ginlaragway ni Punay nga “absurd” ang report bangud suno sa iya, may pila ka numero ukon figures diri nga wala nagatupong sa mga rekord sang korporasyon.
Apang, nag-object si Private Prosecutor Atty. Lorna Kapunan kag ginpangabay nga ipakuha sa opisyal nga rekord ang nasambit nga pulong.
Suno kay Kapunan, wala sang bastante nga basehan si Punay agud kuwestyunon ang pagkaeksakto sang forensic report ni Cabrera.
Bisan pa nagbayluhanay sang argumento ang duha ka abogado, ginpaboran ni Escudero ang objection sang prosekusyon kag ginmando nga kuhaon ang pulong nga “absurd” sa opisyal nga rekord sang pagdinig.
