Nagaabot na sa 75 ka establisyemento sa Syudad sang Koronadal ang ginpadal-an sang notice bangud sa wala pa sang nagakaigo nga building permit, lakip na diri ang 10 ka pickleball courts.
Sa interview sang Bombo Radyo Koronadal, ginpahayag ni Engineer Charlie Laput, hepe sang Office of the Building Official, nga sobra na sa 60 ka pickleball courts ang nagapadayon sang operasyon sa syudad, apang wala pa natapos ang inspeksyon sa tanan nga pasilidad.
Suno kay Engr. Laput, responsibilidad sang tagsa ka tag-iya sang negosyo nga tumanon ang mga kinahanglanon kag regulasyon sang syudad, lakip na ang pagkuha sang nagakaigo nga mga permit antes mag-operate.
Gindugang pa niya nga indi patas sa mga negosyante nga nagasunod sa mga regulasyon kag nagabayad sang nagakaigo nga buhis kon may iban nga establisyemento nga nagapadayon sang operasyon nga wala pa nakatuman sa amo man nga mga kinahanglanon.
Bangud sini, ginpanawagan ni Engr. Laput ang tanan nga negosyante, ilabi na ang mga establisyementong nakabaton sang notice, nga gilayon nga tumanon ang mga pagsulundan kag kompletohon ang kinahanglanon nga mga permit agud malikawan ang posible nga paglapas sa mga ordinansa sang syudad.
