Ginapahanumdom sang City Anti-Drug Abuse Council (CADAC) sang Koronadal City ang publiko nga indi dapat madulaan sang padayon nga pagpalab-ot sang kasayuran kag pagpahibalo sa komunidad sa tunga sang pagsupak sang iban sa mga programa kontra iligal nga droga.
Sa interview sang Bombo Radyo Koronadal, ginpahayag ni Jerome Atangan, Focal Point Specialist kag Administrative Officer sang CADAC, nga isa sa mga masami nila nga nabatian amo ang pagpati sang iban nga wala na sing pulos ang programa bangud nagabalik-balik lamang sa paggamit sang iligal nga droga ang pila ka indibiduwal.
Apang suno kay Atangan, indi dapat ini mangin rason agud untatan ang mga hilikuton, ilabi na ang pagpahibalo kag mga talakayan sa mga barangay kag komunidad, nga importante nga bahin sang paglikaw sa pag-abuso sang droga.
Samtang, ginakilala man niya ang pagpakita sang dedikasyon sang mga barangay sa kampanya, matapos makuha sang tagsa ka barangay sa Koronadal City ang 100 porsiyento nga CBDRP Accreditation.
