Indi pagatugutan nga himuon nga parkingan sang mga salakyan ang atubangan sang City Hall grounds sa Koronadal City sa tion sang palaabuton nga PASKORONADAL agud mapabilin ini nga hilway para sa publiko.
Sa interview sang Bombo Radyo Koronadal, ginpahayag ni Joy Placer, City Traffic Management Division Head, nga nagaprepar na ang ila talatapan sang mga tikang para sa hapsay nga pagpatigayon sang selebrasyon.
Suno sa iya, duha ka katapo sang ila talatapan ang natakda nga maghatag sang bulig kag seguridad, kaupod sang mga pulis nga igabutang sa lugar.
Ang ginatugutan nga parkingan magasugod sa may convenience store pakadto sa punta sang lugar agud indi maghuot ang palibot sang City Hall grounds kag indi mabudlayan ang mga bisita.
Ginpahanumdom man ni Placer ang publiko nga indi magdugay sa pagkuha sang litrato sa dalan, ilabi na kon may mga kabataan nga kaupud, agud malikawan ang aksidente kag iban pa nga katalagman.
