Yara na sa kustodiya sang Criminal Investigation and Detection Group ukon CIDG-BARMM ang isa ka sub-commander sang Daesh/ISIS – inspired Bangsamoro Islamic Freedom Fighters ukon BIFF matapos maarestar sa Poblacion, Datu Piang, Maguindanao del Sur.
Ginkilala ni CIDG-BAR Regional Chief Lt. Col. Ariel Huesca ang suspek nga si Abunawas Ibad Damiog alyas Commander Bayawak, 65-anyos nga taga Barangay Alongan, Datu Piang, Maguindanao del Sur.
Si Commander Bayawak ang rank 3 most wanted person sang PNP sa BARMM.
Siya ang nagapangatubang sang mga kaso nga murder, double frustrated murder, multiple attempted murder, destructive arson kag Anti-Terrorism Act of 2020.
Kadungan sa pag-arestar sa iya narekober ang isa ka caliber .45 pistol nga nakasab-it pa sa hawak sini.
Suno pa kay Huesca, nag-ugat ang kaso nga multiple attempted murder kag destructive arson ni Commander Bayawak bangud sa pag-atake nila sadto anay sa mga katapu sang Datu Piang PNP samatang nagapatrolya sa Barangay Poblacion kag ginsunog ang patrol car.
Ginharass man nila ang detachment sang militar sa Barangay Kanguan.
Kaupod sini sa pag-atake ang yara sa 90 ka mga katapu sang BIFF.
Wala man nila ginpalampas ang Sta.Teresita Parish Church nga nag-angkon sang guba sang December 2020.
Ang iya nga kaso nga murder kag double frustrated murder naman ang may kahilabtanan sa pag-pangatake nila sa Barangay Meta, Datu Unsay sang tuig 2012 kun diin napatay si Private First Class Roger Warde samtang pilason naman anbg duha pa sini ka kaupod nga mga suldado.
Kaupod man ni Bayawak sadto anay si Kumander Ameril Umbra Kato sa pag-atake.
Samtang, ginahibalo pa sang CIDG kun involbado man si Commander Bayawak sa iban pa nga kalakasan sa Maguindanao del Sur.
Kun madumduman ang nasambit nga sub-commander sang BIFF Bungos faction kag deputy chief for military affairs ang nagsungka na sa 1st Mechanized Infantry Brigade sa Ampatuan, Maguindanao Sur sang 2021.
Ginpaklaro man sini nga sadto nga tion wala pa ini sang mga warrant of arrest gani wala ini ginkustodiya sang mga otoridad.
