KORONADAL CITY – Wala pa sang may namonitor ang militar nga mga aspiring canidates sa palaabuton nga midterm elections nga nakabaton sang pamahog gikan sa extortion groups sa South Central Mindanao.
Ini ang ginkumpirmar ni Lt. Col. Roden Orbon, spokesperson sang 6th ID, Philippine Army sa interview sang Bombo Radyo Koronadal.
Apang suno kay Orbon, bukas ang ila talatapan sa pagbulig sa sin-u-man nga kandidato nga ginapahog kag ginapangayuan sang kwarta kabaylo sang kampanya sa ipatigayon nga eleksiyon sa madason nga tuig.
Subong pa lamang nagapreparar naman ang militar sa pagsiguro nga luwas ang sin-u-man nga aspiring candidates.
Nahibaluan nga magluwas sa grupo sang Bangsamoro Islamic Freedom Fighters ukon BIFF, ginatutukan man sang militar ang presensiya sang iban pa nga local armed groups, private armies kag mga rebelde nga New Peoples Army ukon NPA.
Sa pagkamatuod, ginamonitor nila ang posibilidad nga recruitment sang mga ini agud nga madugangan ang myembro sang ila mga grupo.
Ginpasiguro man sang opisyal nga yara ang militar nakabantay adlaw-adlaw agud siguruhon ang kaluwasan sang katawhan.
