KORONADAL CITY – Pormal na nga ginbuksan ang Soccsksargen Regional Athletic Association Meet ukon SRAA 2024 sa siyudad sang General Santos.
Ini ang ginkumpirmar ni Mr. Magdaleno “Jojo” Duhilag, Regional Sports Officer sang interview sang Bombo Radyo Koronadal.
Nangin madinuagon ang parada sang mga atleta, coaches, technical officials, Deped officials kag mga dinapit nga bisita sa opening ceremony sang SRAA 2024 kung diin nasaksihan ang colorful nga uniforms sang tagsa ka delegasyon.
Gintambungan naman sang nilibo ka mga delegasyon ang programa sa Acharon Sports Complex kun diin may mga sorpresa man nga ginalauman gikan sa Local Government Unit sang General Santos City sa pagpanguna ni Mayor Lorelie Pacquiao.
Nangin dinapit naman nga bisita sa opening sang SRAA 2024 si anay Senador kag Peoples Champ Manny Pacquiao.
Kalakip sa mga division nga magapaindis-indis sa SRAA 2024 ang mga delegasyon gikan sa Koronadal City, Kidapawan City, General Santos City, Tacurong City, South Cotabato, Sultan Kudarat, Saranggani kag Cotabato province.
Ginalauman naman nga magalab-ot sa masobra 8000 ka indibidwal ang magatambong sa lima ka adlaw nga sports competition humalin subong nga adlaw tubtob Mayo 17,2024 .
Una diri, ginpasalig man sang opisyal nga preparado na ang tanan nagikan sa mga billeting schools, playing venues, seguridad kag pagpasiguro sang kaluwasan sang tanan.
