KORONADAL CITY- Nagapadayon ang imbestigasyon sang mga otoridad sa ginbungkag ang nitso ukon pantiyon sang isa ka 7 months nga lapsag sa Bo. 4 cemetery diri sa siyudad sang Koronadal sang Biyernes Santo.
Siya si Baby Christian nga napatay bangud sa Pneumonia apang nagapati ang pamilya nga gin-aswang ini.
Sa interview sang Bombo Radyo kay Ginang Rosanna Sibua, lola sang lapsag, ginlubong sang Marso 20,2024 ang iya apo matapos ini nga ginbawian sang kabuhi.
Natukiban nila nga ginwasak ang pantiyon sini kaina sang aga matapos nga indi mapahamtang ang nanay sang lapsag.
Indi pa mahibaluan sang pamilya kun ano ang rason ngaa ginbuksan ang nitso sang lapsag kag gintinguhaan nga ipaguwa ini.
Nagapati naman ang embalsamador nga nagcheckyar sa lawas sang lapsag nga ginpaguwa na nga daan ang bangkay agud balikan alas-12 karon sa tungang gab-i agud nga kuhaon ang tuway-tuway ukon pila ka parte sang lawas sini.
