KORONADAL CITY – Dead on the Spot ang isa ka lalaki matapos ini ang ginaalegar nga nagbato sa mga kapulisan sa ginpatigayon nga operasyon sang HPG PHU, SCPPO kag sang Koronadal City PNP sa Purok Lower Cadidang, Brgy. San Jose Syudad sang Koronadal.
Ang napatay nga biktima ang ginkilala kay Rex Valeriano, 37 anyos residente sang nasambit nga lugar. Sa interbyu sang Bombo Radyo Koronadal kay Alyas Maymay, utod sang biktima, ginpahayag sini nga nakibot na lamang ini sang makabati sang 6 ka magkakasunod nga lupok sang armas luthang kag ginkakugmat nga makita ang ila himata nga makita ang higda na sa naibabaw nga bahin sang bakulod may 25 metros ang kalayuon sa ila panimalay.
Nag-agom sang pila ka igo sang bala sa iya ulo kag lawas ang biktima nga nangin tunuaan sang iya kamatayon.
Nahibaluan nga ang biktima ang isa suno pa sa mga suspek nga ginaalegar nga nagpalupok sa isa ka katapo HPG-South Cotabato kag makapalagyo sang tinalikdan nga gab-i sa bahin sang Purok Tuburan sa Brgy.Sta.Cruz sa Syudad sang Koronadal.
Apang sa pihak nga bahin, indi mabaton sang pamilya ang natabo kay Rex, bangud indi suno pa makatarungan ang ginhimo sang mga kapulisan.
