Nagdangat na sa walo ang numero sang napatay sa nagluntad nga magnitude 6.8 nga linog sa Davao Occidental sang tinalikdan nga Biyernes, Nobyembre 17, 2023.
Ini ang nangin pahayag ni Ms. Jorie Mae Balmediano, Information Officer sang OCD 12 sa interbyu sang Bombo Radyo Koronadal. Suno sa iya, gikan sa Sarangani ang apat ka napatay, tatlo sa General Santos City, kag isa sa Davao Occidental.
Samtang, 13 naman ang nabalhag nga napilasan sang linog.Dugang pa diri, 54 ka puloy-an ang nabalhag nga nahalitan sa Davao Occidental, Davao Oriental, South Cotabato, kag Sarangani; 71 ka istruktura man ang nahalitan sa Davao City, Davao Occidental, Davao del Sur, Davao del Norte, Davao de Oro, South Cotabato, kag Sarangani.
Naglab-ot naman sa 1,509 indibidwal ukon 180 ka pamilya ang naapektuhan sang nahalitan nga mga puloy-an kag istruktura.
Sa karon padayon ang pagpanghatag sang bulig sang magkatuhay nga ahensya sang gobyerno sa mga apektado.
