Ginakasubo sang mga retailers sang bugas diri sa Koronadal City ang mandu ni President kag Agriculture Secretary Ferdinand Marcos, Jr. nga pagpatuman sang price ceiling sa bugas, epektibo adlaw sang Setyembre 5.
Ang price ceiling ang nagatumod sa pinakamataas nga presyo nga mahimo ipatuman sang isa ka producer ukon manugbaligya.
Sa Executive Order No. 39 nga ginpaguwa sang presidente, ginmandu ang P41 per kilogram nga price cap para sa regular-milled rice kag P45 per kilogram para naman sa well-milled rice.
Sa interview sang Bombo Radyo Koronadal kay Jojo Mallorca, isa ka Retailer iya ginpahayag nga maathag nga wala napanumduman sang maayo antes ginpatuman ang price ceiling.
Madamo pa suno sa natungdan ang mga stocks ang mga retailers sa diin kun ibaligya nila ini sa mas barato nga presyo, pat-od nga indi sila makabawi sa ila capital. Kuntani suno sa natungdan, hatagan anay sila sang isa ka semana agud makapreparar sa pagpatuman sang price ceiling.
Sa tion nga magpadayon ang pagpatuman sini, ginpahayag ni Mallorca nga indi lang ang mga retailers ang mga maapektuhan kundi ang mga mangunguma mismo.
