KORONADAL CITY- Amat-amat na nga nakabalik ang nilibo ka mga pamilya nga nagbakwit makaligad ang padayon nga engkwentro humalin pa sang Sabado sang duha ka grupo nga Moro sa Datu Saudi Ampatuan sa Maguindanao del Sur.
Ini ang ginpahayag ni Brig. General Oriel Pancog, Commanding Officer sang 601st Brigade, Philippine Army sa interbyu sang Bombo Radyo Koronadal.
Suno sa iya, ang nasambit nga kinagamo ginakaulamiran sang mga miyembro sang 105th kag 118 Base Commands sang Moro Islamic Liberation Front.
Away suno pa sa teritoryo, pulitika kag control sang mga lokal nga komunidad ang rason sang nasambit nga giyera sang mga grupo nga katapo sang 105th kag 118th Base Command sang MILF.
Nahibaluan nga una na nga nag away ang duha ka grupo sang naglabay nga bulan sang Marso nga nag resulta sa pagbakwit man sang masolosobra 2,000 nga mga pamilya nga Moro sa nagkalain lain nga lugar.
Sa karon nag-abot man sa 2,300 families o halos 11,000 ka mga indibidwal ang inisyal na nga nag-evacuate sa kahadlok nga maipit sa kinagamo.
Sa karon, may nakabalik na sa ila nga panimalay apang may yara sa gihapon nga nagapabilin sa mga evacuation sites.
Nahibaluan nga may yara man sang mga kabataan nga apektado sa nasambit nga kinagamo.
