KORONADAL CITY-Nagapaayo na sa subong sa balay-bululngan ang isa ka collector nga nangin biktima sang panibag-o nga serye sang pagpangluthang sa bahin sang Lapu-Lapu Proper Road, Purok Lapu-lapu Proper, Barangay Poblacion, Sto. Niño, South Cotabato.
Ginkilala sang kapulisan ang biktima nga si Jay-r Dapitan Sindol, 35-anyos, may asawa, Globe Collector, kag residente sang Barangay Guinsang-an sang nasambit nga banwa.
Naguwa sa imbestigasyon sang mga otoridad nga samtang naga pakigtransaksiyon ang biktima sa iya sini nga kliente sa nasambit nga lugar sang hinali na lamang ini nga ginpalapitan sang isa ka wala pa nakilal-an nga lalaki kag ginluthang sang makapila ka bes.
Matapos ang krimen ginbilin na lamang sang suspek ang biktima nga duguon sa crime scene kag gin kuha ang motor sang biktima kag madasig nga nagpalagyo.
Madasig naman nga nakaresponder ang rescue team sang lugar kag nadala pa ang biktima sa balay-bululngan.
Sa subong, naga padayon naman ang imbestigasyon sang mga kapulisan sa nagluntad nga krimen.
