Ginkumpirma sang International Criminal Court (ICC) Trial Chamber III nga may kapasidad sa pisikal kag mental nga aspeto si anay Presidente Rodrigo Duterte nga mag-atubang kag magpartisipar sa mga hearing sang kaso nga ginapangatubang niya sa The Hague.
Suno sa Chamber, kontento ini sa resulta sang medical assessment nga ginhimo sang mga eksperto kag sa mga ebidensiya nga ginpresentar parte sa kondisyon sang anay pangulo.
Bangud sini, ginkonsiderar nga may kapasidad si Duterte nga magpartisipar sa masunod nga mga proceedings.
Magsugod ang hearing sa Nobyembre 30, 2026, kag ginmanduan na man sang Chamber ang ICC Registry nga magpreparar sang mga kinahanglanon para sa pagpatigayon sini.
Lakip sa ginakonsiderar ang posibilidad nga makatambong si Duterte paagi sa video conference, depende sa pagtugot sang Chamber. Paagi sini, mahimo gihapon siya makapakig-angot kag makapakonsulta sa iya mga abogado samtang ginapadayon ang proceedings.
Sang nagligad nga ikatatlo nga status conference sang Setyembre 16, nagpangabay ang kampo ni Duterte nga ipailalom pa siya sa dugang nga medical examinations.
Ginpahayag sang iya mga abogado nga base sa mga nagligad nga pagsusuri, may mga senyales kuno sang paghina sang iya memorya ukon pagkadulom sang iya pagdumdom.
Apang, matapos usisaon ang mga report kag assessment sang mga eksperto, nagdesisyon ang Trial Chamber III nga bastante ang yara nga ebidensiya agod makonsiderar si Duterte nga may kapasidad sa pagpartisipar sa paglilitis.
Si Duterte nagaatubang sang kaso nga crimes against humanity nga may kaangtanan sa madugo nga kampanya batok sa ilegal nga droga sang panahon nga siya alkalde sang Davao City kag sang ulihi nangin Presidente sang Pilipinas.
