KORONADAL CITY – Nakilala na ang bangkay sang isa ka lalaki nga nasapwan nga nagalutaw-lutaw sa irrigation canal sa bahin sang Purok Maharlika, Barangay GPS, Koronadal City pasado alas-7 kaina sang aga.
Ginkilala ni Barangay Kapitan Margarita Subaldo ang biktima nga si Sandy Anselmo, yara sa legal nga edad kag residente sang Crossing Diaz, Barangay Zone lll, Koroadal City.
Suno sa kapitan, nakabaton ini sang report angot sa bangkay apang ulihi na ini nakilala base sa iya nga ID.
Natukiban man nga may kaso sang pagpangawat ang biktima.
Sandig sa pag-chekyar sa bangkay sang biktima, nakita ang pilas sa ulo sini nga ginapatihan ginhampak sang matig-a nga bagay kag ginhaboy lamang sa irrigation canal.
Apang wala naman sang may nakita ang kapulisan nga indikasyon nga ginkulata ang biktima kag ginapatihan nga nadanlog ini kag naigo ang ulo sa matig-a nga butang kag bangud sa kahulugbon wala ini nakaluwas.
Gindala na sa isa ka punerarya ang bangkay sini apang nagapadayon man ang imbestigasyon sang kapulisan sa natabo.
