KORONADAL CITY – Magabulig ang CHR-12 sa pagpasaka sang kaso batok sa PNP kun mapamatud-an nga may kapaltaha ang ila nga ginhiwat nga operasyon.
Ini ang nangin pahayag ni Atty. Keysie Gomez, OIC-Regional Director CHR 12 sa interbyu sang Bombo Radyo Koronadal.
Suno sa iya, sa subong gina-sekyar pa sang komisyon ang mga documento nga kinahanglan para sa pag-lunsar na sang imbestigasyon angot sa kaso.
Una naman nga ginpahayag ni Atty. Gomez nga magapatigayon sila sang separar nga imbestigasyon sa kaso sang pagkapatay sang 3 ka mga kabataan nga gina-alegar nga nagbato sa mga otoridad sa bahin sang Lambayong, Sultan Kudarat.
Kun madumduman nagpanindugan ang Lambayong MPS nga lehitimo ang operasyon sang mga ini batok sa mga suspek nga suno sa ila nagpalupok sang armas luthang antes pa napatay.
Apang nagpahayag ini nga kung mapamatud an man nga wala gid sala ang mga kabataan, may yara man sang nagakaangay nga kaso ang igapasang-at sa mga indibidwal nga imbuldado sa pagpatay labi nagid sa mga katapo sang mga kapulisan nga nagpatigayon sang operasyon.
Sa karon nahibaluan nga ginrelieve na sa pwesto si Pmaj Tonacao kag ang mga kaupod sini nga pulis sa nasambit nga operasyon nga ginkapatay sang tatlo ka mga kabataan suno naman sa pahayag sang PRO 12.
