KORONADAL CITY – Nagasagol ang kaakig kag kasubo sang pamilya sang napatay sa nagluntad nga pagsigabong sang improvised explosive device (IED) sa isa ka unit sang YBL ala-1045 kahapon sang aga sa siyudad sang Tacurong.
Sa eksklusibo nga interview sang Bombo Radyo Koronadal kay Mr. Markchil Barbosa, bata sang napatay nga biktima nga si Mr. Gilbert Barbosa, kuntani makonsesiya suno pa sin-u-man nga may kahimuan sang pagbutang sa IED.
Dugang pa sini, indi na dapat masulit pa ang hitabo bangud makaluluoy ang mga inosente nga madalahig.
Kun may kaakig suno pa ang mg aini sa gobyerno, didto sila magpaupok kag indi sa mga sibilyan nga nagapangabuhi lamang sang insakto.
Kaangot sini, nagasinggitan man sila sang hustisya para sa ila napatay nga amay.
Nahibaluan nga ginhawiran pa kuntani sang iya mga kabataan si Manong Gilbert nga indi anay magbiyahe pabalik sa banwa sang Tupi kun sa diin ini nagatrabaho sa sulod na sang masobra isa ka tuig.
Antes suno pa ini nga gindul-ong sang iya bata, makapila ka beses man in inga nagbalik-balik sa ila puluy-an.
Dugang pa sang bata sang biktima, sini nga bulan sang Nobyembre na lamang kuntani ang katapusan nga pagtrabaho sini sa Tupi.
Sa karon, nagapasalamat ang pamilya sa bulig nga ila na nga nabaton halin sa DSWD-CIU-Sultan Kudarat.
Nagahingyo man ang pamilya nga idul-ong ang bangkay sang ila amay sa Barangay Balabag, Carmen, North Cotabato bangud didto nila ini igahaya.
