KORONADAL CITY – Naglab-ot sa lima ka mga high value target nga indibidwal ang napatay sa ginpatigayon nga police operation sa Sitio Mapayag, Lambayong, Sultan Kudarat.
Ini ang ginkumpirmar ni PMAJ Jenahmeel G. Toñacao, hepe sang Lambayong MPS sa interview sang Bombo Radyo Koronadal.
Suno kay Toñacao, nagbato kag nakig-kambyuhanay sang lupok sa raiding team ang mga target sang search warrant rason nga nagresulta ini sa pagkapatay sang mga ini.
Target sang nasambit nga operation ang mga most wanted person nga sanday Adhen Salbo, Loy Salbo kag apat ka iban pa.
Kalakip sa nagpatigayon sang operasyon ang Lambayong MPS, PDEA12, SKPDEU, 1ST SKPMFC, RSOG, RID, 1202nd RMFB12, SK HPT, 43RD SAC PNP SAF kag 14MICO.
Dugang pa sang opisyal, una nga naglupok ang mga suspek rason nga nagbalos ang raiding team nga nagresulta sa pagkapatay sang target kag apat ka mga kaupdanan sini.
Narekober sa puluy-an sang target ang ginabulubanta nga masobra 50 gramo sang shabu nga may estimated street value nga Php 325,000.00.
Narekober man sang mga otoridad ang nagkalain-lain nga sahi sang mataas nga kalibre sang armas, mga bala kag empty shell.
Gindala naman sa morgue sang Sultan Kudarat Provincial Hospital ang bangkay sang mga napatay nga suspek samtang padayon pa nga ginahibalo kun may iban pa nga kaupdanan ang mga ini.
