KORONADAL CITY – Ginbawian sang kabuhi ang isa ka preso sang Barera Municipal Police Station matapos nga nangin biktima sang pagpangtorture.
Ginkilala ang napatay nga si Johairie Maongco Dagalangit, padulong kuntani ang biktima kag abyan sini sa banwa sang Balabagan, Lanao del Sur sang wala ginhungod nga nabungguan ang isa ka bata sa Barangay Tugaig.
Gilayon nga nagsungka si Johairie sa Kapitan sang Barangay Tugaig nga amo naman ang nag-turnover sa kapulisan sang Barera Municipal Police Station.
Apang pag-abot sang aga, ginkakibot na lamang sang pamilya ni Johairie sang ginpahiblo sa ila nga napatay na ini sa sulod sang presuhan bangud daw sa “bangungot”.
Apang sang ginlantaw nila ang bangkay, puno sang lagub kag pila sa nagkalain-lain nga bahin sang iya lawas ang biktima.
Dako naman ang pagpati sang pamilya nga ginpabudlayan ukon gintorture ang ila himata rason nga ginbawian ini sang kabuhi.
Gilayon naman nga ginkumpirmar sang SOCO sa pamilya sang biktima nga may natabo nga pagpanakit sa iya nga amo naman ang gintunaan sang kamatayon sini.
