KORONADAL CITY – Lubos ang pagpasalamat sa Bombo Radyo sang isa ka maltreated OFW sa Dammam, Saudi Arabia matapos nga luwas nga nakapauli na sa banwa sang Tboli, South Cotabato.
Personal nga ginpadulungan ni Ms Charmie Doming, 27 anyos, may asawa kag duha ka kabataan ang warwagan sang Bombo Radyo agud magpalab-ot sang pagpasalamat nga ginbuligan ini nga ma-rescue gikan sa mapintas sini nga employer kag nakapauli sa pungsod.
Suno kay Doming, nagpabaskog anay siya kag gintapos ang quarantine antes nga nagpadulong sa waragwagan agud personal nga ipalab-ot ang pagpasalamat sang iya bug-os nga pamilya bangud kun wala siya nagreklamo sa Bombo, wala gindali sang Agency sini ang pagpauli sa iya.
Madumduman nga sang Marso 26,2022, naghingyo sang bulig ang pamilya ni Doming bangud sa kondisyon sini.
Si Charmie ang nagsuka sang dugo kag halos indi na mahulag ang lawas apang padayon nga ginapatrabaho sang iya employer.
Isa ka bulan man siya nga ginpatrabaho sa abyan sang employer sini bangud wala sila nagaintindihanay.
Didto niya na-eksperiensiyahan ang mapreso sa sulod sang kwarto nga wala sang pagkaon kag malimpyo nga tubig nga mainom.
Gin-agwanta sini ang tubig sa CR para lamang madula ang gutom sini kag kauhaw sa sulod sang pila ka adlaw.
Bangud sa kagutom nagsakit si Doming, naghalabok ang lawas sini sa wala mahibaluan nga rason kag halos indi na ini makabangon.
Matapos mainterview sang Bombo si Doming kag iloy sini gilayon nga naghulag ang Agency kag ang Polo-OWWA kag ginproseso ang pagpauli sa iya sa pungsod.
Gilayon man nga ginproseso sang iya employer ang exit visa sini kag ginkuhaan sang ticket papuli sa Pilipinas.
Apang nagtinir pa ini sa accommodation sang POLO-OWWA kag naghulat sang tion nga ma-repatriate sa pungsod.
Nangin kabahin man sa pagproseso ang OWWA-12 matapos nga nagpalapit didto ang iloy sang OFW.
Kaangot sini, nagapanawagan si Doming sa mga OFW nga kasubong niya nga mangin maisog sa anuman nga
hangkat sa iban nga pungsod kag makig-angot sa Bombo sa tion nga may problema ang mga ini.
