KORONADAL CITY – Naglab-ot sa masobra Php7M ang napagkit nga damyos sa pagkasunog sang Ukay-Ukay section sa Public Market sa banwa sang Polomolok, South Cotabato.
Ini ang ginpahayag ni SFO1 Philip Chan, Information Officer BFP Polomolok sa interview sang Bombo Radyo Koronadal.
Suno kay SFO1 Chan, nagsugod ang sunog sa isa ka stall sang Ukay-ukay section sa 2nd floor sang Public Market pasado alas-6, Domingo sang aga.
Yara sa 33 ka mga Ukay-ukay kag RTW vendors ang apektado sang sunog matapos nga naabo ang mga produkto nga ginabaligya sang mga ini.
Una na naguwa ang report nga electrical wiring ang rason sang sunog apang padayon pa nga ginaberipikar sang BFP ang matuod nga ginsuguran sang kalayo.
Nagpromisa naman si Polomolok Mayor Bernie “Jojo” Palencia nga maghatag sang bulig sa mga apektado nga vendors.
Kadungan sini, nagpanawagan naman ang BFP Polomolok sa mga pumuluuyo nga sa tion nga may magluntad nga sunog e-report gilayon sa ila antes nga magkuha sang video agud mahingagaw nga matapna ang pagdako sang kalayo.
