KORONADAL CITY – Hugot nga ginkundenar sang kasuldaduhan ang ang natabo nga pagpatay sa mga katapu sang CAFGU Active Auxiliary ukon CAA sa Awang-Dalican highway sa Sitio Gubat, Brgy Makir, Datu Odin Sinsuat, Maguindanao.
Ini ang ginpahayag ni Lt.Col. Dennis Almorato, tigpamaba sang 6th ID Philippine Army.
Suno kay Almorato nag-angkon sang tuman ka damo nga igo sang bala sa nagkalain-lain nga bahin sang ila lawas ang mga napatay nga biktima nga ginkilala kanday Tong Kaul, Mama Mohamad kag Arsad Datu Ali.
Samtang, padayon naman nga ginabulong sa hospital ang isa sa mga survivor nga si Salindatu Mangulamas.
Nagguwa sa imbestigasyon sang mga otoridad nga samtang sakay sang toyota Corolla nga may plate number UMZ 509 ang mga biktima ginbalabagan ang mga ini sang wala makilala nga suspek nga nakamotorsiklo kag ginpaulanan sang bala usar ang automatic rifles.
Padulong kuntani sa Bagang Detachment sa Guindulungan gikan sa Taviran, Datu Odin Sinsuat ang mga ini matapos nga nagtambong sa culmination sang CAA Refresher.
Kaangot sini, gindoble pa sang mga otoridad ang pagbantay sa tagsa ka check point kag ginahingyo ang kooperasyon sang katawhan agud madakpan ang mga armado nga suspek.
