KORONADAL CITY- Wala pa sang tanto nga sabat sa karun ang Department of Energy, Mindanao field Office kun san-o pa matapos ang tuman nga pagsaka sang presyo sang gatong sa karun para mangin estable na ang presyo sini sa bilog nga Mindanao.
Sa interview sang Bombo Radyo Koronodal kay Director Nilo Geroche, Director sang DOE-Mindanao Field office, ginpahayag sini nga indi pa nila matumod sa karun kun san-o pa mag constant ang presyo sang gasolina bangud may deregulation sa subong nga naga luntad sa mga produkto nga petrolyo bangud sa domino effect sang Russia kag Ukraine War sa bahin sang Europa.
Ginhimo sang Director ang pahayag sa naga naman nga pagsaka sang presyo sang petrolyo sa palaabuton nga semana nga posible naman nga makaapekto ang ini nga pagsaka labi na sa mga drivers kag operators sa bilog nga kalibutan.
Suno pa sa iya, madamo sang dapat nga lantawon sa aspeto sang pagsaka sang presyo sini sa lokal kag international nga aspeto.
Una diri nga maka apekto sa lokal nga presyo sang gatong ukon supply disruption amu ang mga kalamidad nga nagaluntad sa Pilipinas sa diin naga sulod naman ang mga illegal nga pagbaligya sang gasolina nga tuman naman nga pagpatong sa presyo nga padayon man nga gina-monitor sang ila nga talatapan.
Sa tunga sini, ginpasiguro naman sang ila nga talatapan nga husto pa man sang supply sang gatong sa subong sa bilog nga Mindanao apang may ara lang sang pagsaka sang presyo sini.
