Ginpabutyag ni Deputy Speaker kag Iloilo Representative Janette Garin nga importante nga mapabilin ang maayo nga relasyon sang Pilipinas kag China, ilabi na sa bahin sang kalakalan kag ekonomiya.
Apang, suno kay Garin, kinahanglan anay nga maathag ang mga impormasyon nga ginpagwa bahin sa ginasiling nga report sang Anti-Money Laundering Council ukon AMLC nga may kaangtanan sa kapin P319.3 milyon nga kwarta halin China nga nagsulod sa Calle 88 Foods Corporation.
Ginpahayag man ni Garin nga kinahanglan maathag ang ginasiling nga kapin P4.4 bilyon nga kabug-usan nga transaksiyon nga nagsulod kag naggwa sa mga account ni Vice President Sara Duterte kag sang iya bana.
Suno sa deputy speaker, importante ang pagpaathag sang amo nga mga impormasyon agud malikawan ang pagduda kag masiguro nga husto ang paghangop sang publiko sa mga financial records nga ginatalakay sa impeachment proceedings.
Samtang, nagapadayon ang pagtalakay sang mga financial records kag AMLC information bilang bahin sang proseso sang impeachment batok sa bise presidente.
