KORONADAL CITY – Yara na sa kustodiya sang mga otoridad ang isa ka pulis nga nagmaoy kag nagpangluthang sa isa ka apartment sa Barangay Zone 3, Koronadal City nga nagresulta sa pagkapatay sang isa kag pagkapilas naman sang 2 ka iban pa lakip na nag nobya sini.
Sa eksklusibo nga interbyu sang Bombo Radyo Koronadal kay Police Lt. Col. Joedy Lito Guisinga, hepe ng Koronadal City Police Station, service firearm nga M16 assault rifle mismo sang pulis nga si Pat. Roland Lopez, 29, nga residente sang Brgy.Topland Koronadal City kag naka-assign sa South Cotabato 1st PMFC ang gingamit sini sa pagpagpangluthang.
Nadakpan si Lopez sa Barangay Titulok, Bagumbayan, Sultan Kudarat sang Bagumbayan PNP pasado alas-2 Huwebes sang hapon sakay sang iya kaugalingon nga salakyan.
Madumduman nga napatay ang abyan sang nobya sini nga si Chaci Canlas, yara sa legal nga edad, graduating student kag residente sang Isulan Sultan Kudarat samtang ang mga pilason amo sanday Joana Saptula, karelasyon sang suspek nga residente man sang Isulan Sultan Kudarat kag ang nobyo naman ni Canlas nga si Debie John Franco, 21 anyos nga taga-Purok Garcia , Brgy. Rotonda sini nga siyudad.
Sa panaysayon sang isa ka testigo sa Bombo Radyo, may mainit nga argumento suno pa ang magkarelasyon nga Lopez kag Saptula Miyerkules sang gab-i kun diin ginpablotter pa sang mga biktima ang suspek.
Apang, alas-2 Huwebes sang kaagahon nagbalik ang suspek dala ang iya nga service firearm, ginbuka ang bintana sang apartment kun din nagatulog ang mga biktima kag ginpangluthang ang mga ini.
Nahibaluan nga may patong sa ulo nga P100K ang suspek gikan sa PNP Region 12.
