KORONADAL CITY – Ginpalab-ot sa Bombo Radyo Koronadal sang grupo sang mga reklamante nga nabiktima sang panibag-o nga investment scheme nga illegal nga nag-operar sa South Cotabato kag iban pa nga lugar sa Mindanao matapos nga gintaban ang milyunes pesos nga investment sang mga myembro sini.
Sa eksklusibo nga interbyu sang Bombo Radyo Koronadal kay Mr. Pergentino Logronio, isa sa mga nabiktima sang Mer’s Business Center, na-engganyo sila nga mag-invest bangud sa nangin maayo naman ang “pay-out “sa una nga mga binulan tubtob nga nautod ini sang bulan lamang sang Setyembre.
Yara sa masobra P600 million ang kantidad sang kwarta nga nakuha sa mga investors sang grupo ni Reynaldo Camingawan, nga amo ang founder kag mga managers sini sa nagkalain-lain nga branch bangud sa 30% – 35% nga porsiyento nga promisa nga interes sa kwarta nga ginhulog sang mga miyembro nga kasubong sadto anay sang KAPA ni Joel Apolinario.
Matapos nga wala na sila nakabaton sang pay-out, ginsira naman ang talatapan sang Mer’s Business Center sa Gensan kag mangin sa Koronadal kag nadula nga daw aso ang mga opisyal sini lakip na kanday Reynaldo kag Roger Camingawan ,Estelito Cenco bilang ,BOD, Arlindo Mahinay kag Joy Mahinay.
Rason nga nagpadala sila sang sulat sa NBI national office sa kabalaka nga indi sila pagsapakon sang NBI Region 12 bangud suno pa sa nauna nga pahayag ni Camingawan nga nagahatag ini sang protection money.
Sa subong, hingyo nila nga matutukan ang kaso kag malagas ang mga scammers kag mabalik ang ila nga kwarta.
Kun madumduman, una na nga nagpaguwa ang Securities and Exchange Commission (SEC) sang advisory laban sa Mer’s Business Center sang nagliligad nga binulan apang padayon sa gihapon ang pagpangolekta sang kwarta sang mga ini.
Sa subong, nagakabalaka ang mga biktima nga basi magdamo pa ang mabiktima nga tawo bangud nga nagakambyo-kambyo lang sang pangalan ang Mer’s Business Center kag nagadamo man ang branch sini sa bilog nga pungsod.
