KORONADAL CITY – Sa pinakauna nga tion, tigayon nga nagsungka sa Koronadal PNP ang 9 nga katapo sang communist terror group nga New People’s Army, kalakip na ang isa ka vice commander kag squad team leader sang nasambit nga grupo.
Lunsay nga yara sa idalom sang Guerilla Front 73 ang nasambit nga surrenderers.
Ginkilala lamang ang mga ini nga sanday alyas March nga amo ang vice commander, alyas Bryan, alyas Dragon nga amo naman ang squad team leader, alyas Roger, alyas Pipoy, alyas Wowie, alyas Brandon, alyas Bongbong, kag alyas Kulit.
Dala sang mga ini ang nagkalain-lain nga mga armas nga ginalakipan sang submachine gun, homemade kag improvised weapons, granada kag mga subersibo nga dokumento.
Sa interbyu sang Bombo Radyo Koronadal kay Koronadal PNP chief of police Lt. Col. Joefel Siason, ginpili sang mga ini nga magsungka sa ila istasyon bangud malapit lamang suno pa ini sa ila ginalugaran sa Sitio Salkan, Brgy Paraiso.
Dugang sang opisyal, nagserbe sila nga augmenting force sang Provincial Mobile Force Company agud mapasungka ang nasambit nga mga rebelde.
Sa subong yara na ang mga ini sa kustodiya sang South Cotabato PNP kag natalana nga magabaton sang mga benepisyo, sandig sa E-CLIP program.
