Maga-atubang sang kriminal kag administratibo nga kaso ang pulis nga nakabunggo-patay sa isa ka walo ka tuig nga bata nga babayi matapos masalpok sang police patrol car ang motorsiklo nga ginasakyan sini kaupod ang iya lola sa National Highway, malapit sa overpass sa Koronadal City, Martes sang aga, Nobyembre 10.
Sa interview sang Bombo Radyo Koronadal, ginpahayag ni Police Lt. Col. Harold Cornel, Chief of Police sang Koronadal City Police Station, nga lakip sa posible nga ipasaka nga kaso batok sa pulis ang Reckless Imprudence Resulting in Homicide kag Reckless Imprudence Resulting in Physical Injuries and Damage to Property, lakip na ang nagakaigo nga administratibo nga kaso.
Ginklaro man ni Cornel nga indi miyembro sang Koronadal City Police Station ang nasambit nga pulis kag wala man ini nagtinguha nga magpalagyo matapos ang insidente.
Kaangot sini, ginpahanumdom ni Cornel ang publiko, lakip ang iya mga kaupdanan sa kapulisan, nga siguruhon nga maayo ang kondisyon sang ila mga salakyan kag yara sa nagakaigo nga pisikal kag mental nga kahimtangan antes magmaneho.
Gin-insister man niya ang importansya sang pagsunod sa mga layi kag regulasyon sa trapiko agud malikawan ang kaangay nga mga aksidente.
