Naglab-ot sa $97.4 bilyon ang gross international reserves (GIR) sang Pilipinas sang Oktubre, ang pinakamababa nga lebel halin sang Disyembre 2022, suno sa una nga datos sang Bangko Sentral ng Pilipinas (BSP).
Nagnubo ini sang 11.7 porsyento kon ipaanggid sa pareho nga bulan sang nagligad nga tuig, kag 2.1 porsyento naman kon ipaanggid sa $99.49 bilyon sang Setyembre.
Suno sa BSP, isa sa mga rason sang pagnubo amo ang pagdula sang bili sang ila gold holdings bangud sa pagnubo sang presyo sang bulawan sa international market.
Nakaapekto man ang kaluya sang piso kag pagbayad sang utang sa iban nga pungsod.
Samtang, ginpahayag ni UnionBank chief economist Carlo Asuncion nga bisan nagapabilin nga bastante ang reserba sang pungsod, mahimo pa ini nga magnubo kon magpadayon ang pagpaluya sang piso.
Sa datos sang BSP, ang nabilin nga reserba sang pungsod bastante para pondohan ang 6.1 ka bulan nga importasyon kag pagbayad sa mga serbisyo kag panguna nga kita halin sa iban nga pungsod.
Ang foreign exchange reserves nagaserbe nga proteksyon sang ekonomiya batok sa mga problema sa global market kag ginagamit man sa pagpondo sang importasyon, pagbayad sang utang sa iban nga pungsod kag pagbulig sa pagmintinar sang kalig-on sang piso.
