Ginpaklaro sang Commission on Elections (COMELEC) sa Koronadal City nga ang liwat nga pagbukas sang voter registration para sa 2028 National and Local Elections kag indi para sa Barangay and Sangguniang Kabataan Elections.
Sa interview sang Bombo Radyo Koronadal, ginpahayag ni Atty. Maleiha Usman-Loong, City of Koronadal COMELEC Officer, nga wala sang pagbag-o sa mga requirements para sa mga luyag magparehistro.
Mahimo na magparehistro ang mga indibidwal nga nagaedad sang 18 anyos pataas, basta makapresentar sang balido nga government-issued identification card (ID).
Ginpahanumdom man ni Loong nga indi pagbatunon bilang valid identification ang barangay certificate, cedula, PNP clearance kag company ID.
Para naman sa mga kinahanglan magpamatuod sang ila residency, mahimo sila magkuha sang affidavit halin sa isa ka registered voter ukon himata tubtob sa fourth degree of consanguinity ukon affinity, nga makapamatuod sang ila aktuwal nga pagpuyo sa nasambit nga barangay.
Ginpabug-atan man sang COMELEC nga kinahanglan ang personal appearance sang aplikante sa tion sang pagparehistro kag indi mahimo nga ipaagi lamang sa iban ang proseso.
