KORONADAL CITY – Nagapadayon ang information and education drive sang Koronadal City Health Office batuk sa kaso nga dengue sa siyudad kasunod sang napagkit nga tatlo ka indibidwal nga ginbawian sang kabuhi.
Ini ang nangin pahayag ni Dr. Vincent Ende ang City Health officer sa interview sang Bombo radyo Koronadal.
Suno kay Ende, humalin sang Enero tubtub Agusto ang napagkit nga casualties nga ginalakipan sang 9 ka tuig nga bata nga babaye, 30 anyos nga babaye nga lunsay mga residente sang Barangay Carpenter Hill kag isa ka 17 anyos nga lalaki halin sa Barangay Morales.
Dugang pa sini,may kabug-usan nga 812 dengue cases na ang Koronadal sandig sa Dengue Bulletin kun diin nagapanguna ang Barangay Sta. Cruz nga may pinakamataas nga kaso nga naglab-ot na sa 94, ginsundan sang Brgy. GPS nga may 89 kag 78 cases naman ang sa Barangay Topland.
Kaagot sini, ginaganyat sang CHO- Koronadal ang mga residente nga ipatuman ang “5s Kontra Dengue” nga ginalakipan sang mga masunod:
Una, Search and Destroy ukon pagpangita sa mga balay ukon breeding sites sang mga lamok.
Ikaduha, Self-protection measures pag-usar sang mga lagba paku nga bayo kag paggamit sang mosquito repellent.
Ikatatlo, Seek Consultation ukon magpadulong sa pinakamalapit nga health center ukon hospital kun may mabatyagan nga sintomas.
Ikaapat, Support fogging in outbreak areas.
Kag ang ikalima ukon pang-ulihi amo ang Sustain hydration para makalikaw sa dehydration.
Kaangot sini, magatanyag sang libre nga CBC/Platelet monitoring ang City Health para sa mga suspected dengue patients.
Nahibaluan nga sa sini nga tuig tuman ka taas ang gindugang sa kaso sang dengue sa siyudad gani padayon ang panawagan sang opisyal nga sundon ang mga paagi agud makalikaw sa balatian.
