Ginpahayag ni South Cotabato Governor Reynaldo Tamayo Jr. ang iya pagpaathag sa nagtuhaw nga nagkalain-lain nga reaksyon bahin sa ginpatigayon nga “Handog ng Pangulo: Serbisyong Sapat para sa Lahat” program kahapon.
Suno sa gobernador, indi posible nga may mga tawo nga wala nahatagan sang serbisyo, bangud may yara na sang listahan ukon mga identified beneficiaries para sa amo nga programa.
Dugang pa ni Tamayo, indi lamang bugas ang ginahatag nga bulig sang gobyerno.
May nagkalain-lain man nga serbisyo halin sa nagkalain-lain nga ahensya nga mahimo mapuslan sang mga residente.
Paathag pa niya, ang konsepto sang programa amo ang paghatag sang nagkalain-lain nga serbisyo sang gobyerno sa mas hapos kag mas organisado nga pamaagi.
Paagi sini, sa isa lamang ka lugar, mahimo na ma-access sang katawhan ang mga serbisyo sang Philippine Statistics Authority ukon PSA, Department of Agriculture, Department of Justice, Department of Social Welfare and Development, PhilHealth, kag iban pa nga ahensya.
Ginpahayag ni Tamayo nga paagi sa amo nga programa, ginatinguhaan sang gobyerno nga mapalapit kag mapahapos para sa katawhan ang pagkuha sang nagkalain-lain nga serbisyo nga ila kinahanglan.
