Matigdas nga ginpahayag sang Iran nga indi ini magsungka sa atubang sang padayon nga pressure halin sa Estados Unidos.
Suno kay Iranian President Masoud Pezeshkian, bisan ano pa kalain ukon kabaskog ang pressure nga ipahamtang sang US, indi magpadala ang Iran kag preparado ini nga depensahan ang ila pungsod.
Gin-akusar man ni Pezeshkian ang Estados Unidos nga ginatarget sini ang mga sibilyan kag importante nga imprastraktura sa baylo nga atubangon direkta ang mga sundalo sang Iran.
Suno sa Iranian leader, kon handa gid ang US magpakig-away, dapat ang ila atubangon amo ang mga sundalo sang Iran kag indi ang mga ordinaryo nga sibilyan.
Gindugang pa niya nga indi magpadala ang Iran sa ginatawag niya nga pagpamigos ukon bullying sang Estados Unidos kag preparado sila nga magpakig-away para depensahan ang ila soberanya.
Samtang, padayon nga ginabantayan sang international community ang nagasaka nga tensyon sa tunga sang Iran kag Estados Unidos bangod sa posibilidad nga maglala pa ini kag makaapekto sa seguridad sang rehiyon.
