Patay ang isa ka 3-anyos nga bata nga babaye sa Sitio Narra Brgy. Nuing, Jose Abad Santos, Davao Occidental matapos nga gin-unay sa paglugos-patay sang kaugalingon sini nga magulang.
Ginkilala sang Jose Abad Santos PNP ang biktima nga si alyas Mary, 3-anyos lamang ang panuigon samtang ang suspek amo ang 17-anyos nga magulang sini nga ginkilala lamang kay alyas Boyax.
Naguwa sa imbestigasyon sang mga otoridad nga hubog ang suspek sang nagpauli ini sa ila puluy-an kag naabtan sini ang iya manghod nga nagaisahanon rason nga gindala suno pa sini sa pugon sang kopras kag didto ginhimuslan ang makaluluoy nga bata nga babaye.
Suno pa sa kapulisan, may nakakita nga mga kaingod sang biktima apang wala sila naga-ekspektar nga himuan ini sang indi maayo sang kaugalingon niya nga magulang.
Nabatian man suno pa sang pila ka residente nga may nagahibi nga bata nga daw nagapangayo sang bulig apang sang ginchekyar na ang bata wala na ini sang panapton kag wala na sang kabuhi.
Sa nasambit man nga lugar nasapwan man ang suspek nga nagasuksok na lamang sang underware kag nagakatulog bangud sa kahulugbon.
Gilayon nga ginrespondehan sang mga kaingod kag ginpahibalo sa mga otoridad ang nagluntad nga krimen tutbob nga nadakpan ang suspek.
Sa natipon nga ebedensiya sang mga otoridad, ginkumpirmar sangsuspek nga ginlugos sini ang biktima tubtob nga napatay.
Wala ini sa iya kaugalingon nga pang-isip bangud yara sa impluwensiya sang illegal nga droga.
Sa karon, yara na sa kostudiya sang kapulisan ang suspek kag natalana nga pasakaan sang nagakaigo nga kaso.
