KORONADAL CITY – Matawhay nga nagsungka sa Regional Mobile Force Battalion (RMFB) 12 ang duha ka opisyal kag isa ka myembro sang New People’s Army (NPA) sa Barangay Kabulanan, Bagumbayan, Sultan Kudarat.
Ginkilala ni Police Lieutenant Colonel Roy P Romualdo, Force Commander sang RMFB 12, ang mga nagsungka nga opisyales sang NPA nga sanday alyas “Jelay”, bilang Medic/Political Instructor/Finance Committee sang Southern Regional Command, MUSA sang Far South Mindanao Region (FSMR); kag si alyas “Jeb-Jeb”, bilang Commander naman sang Platoon Samsung, GF MUSA, FSMR; samtang ang isa ka miyembro ang ginkilala nga si alyas “Joey”.
Suno kay PLtCol Romualdo ang mga nagsungka nga rebelde ang lunsay mga residente sang Magsaysay, Davao del Sur.
Kadungan sang pagsungka sang mga anay nga rebelde gin-turn-over man nila sa 1202nd Maneuver Company, RMFB 12, ang ila nga mga kagamitan kag armas nga ginalakipan sang duha ka unit sang M14 rifle, Improvised Explosive Device, isa ka unit sang hand grenade, mga bala, kag iban pa nga subersibo nga dokumento.
Ginpaidalom na sa debriefing kag pagpatuman sang mga ginakinahanglan nga proseso para malakip sila sa programa sang gobyerno nga Enhanced Comprehensive Integration Program (E-CLIP).
