KORONADAL CITY – Yara na sa kustodiya sang mga otoridad ang isa ka 19-anyos nga lalaki matapos nga maaresto sa ginpatigayon nga anti-smuggling operation sang mga otoridad sa banwa sang Banga, South Cotabato.
Ginkilala ang naaresto nga si alyas “John”, 19-anyos, laborer kag residente ng Purok Magsaysay, Brgy. San Jose sa nasambit nga lugar.
Nakuha sa kustodiya sang suspek ang 708 rim sang smuggled New Berlin cigarettes nag nagakantidad sang P254,880.
Ang mga nakumpiskar nga sigarilyo ang gilayon nga gindala sa Banga Municipal Police Station.
Magapangatubang naman sa kaso nga paglapas sa RA 10863 ukon Customs Modernization and Tariff Act ang naaresto.
Kaangot sini, padayon naman ang panawagan sang mga otoridad nga likawan na ang pagbaligya sang mga smuggled nga sigarilyo.
Ginaawhag man sini ang katawhan nga ipahibalo gilayon sa kapulisan sa tion nga may nahibaluan nga nagabaligya sang illegal nga sigarilyo.
